विनोद शर्मा, जुम्ला जेष्ठ ३१ : जिल्ला ट्राफिक प्रहरी कार्यालय जुम्लाले यस आर्थिक वर्षको ११ महिनामा पौने २ लाख रुपैंयाँ भन्दा बढी राजश्व संकलन गरेको छ । २०६९ सालको साउनदेखि २०७० को जेठ मसान्तसम्ममा १ लाख ८५ हजार ५ सय ९० रुपैंयाँ राजश्व संकलन गरेको हो ।
११ महिनामा १ हजार ९६ जना चालक बारवाहीमा परेकोमा उक्त राजश्व संकलन भएको प्रहरी सहायक निरीक्षक अमर थापाले जानकारी दिनुभयो । सबैभन्दा बढी राजश्व यही जेठ महिनामा संकलन भएको उहाँको भनाइ छ । जेठ महिनामा कार्यालय स्थापना भएको समयदेखि अहिलेसम्मकै धेरै अर्थात २६ हजार ३ सय ५० रुपैंयाँ संकलन भएको छ ।
बैशाख महिनामा २४ हजार १ सय रुपैंयाँ र चैत महिनामा २३ हजार ४ सय ५० रुपैंयाँ संकलन भएको उहाँको भनाई छ । सबैभन्दा कम राजश्व भदौमा १० हजार ३ सय ५० र कात्तिकमा १० हजार ४ सय रुपैंयाँ संकलन भएको थापाले बताउनुभयो ।
कार्यालयले अवैध रुपमा सञ्चालनमा आएको आशंकामा ११ वटा मोटरसाइकललाई थप अनुसन्धानका लागि क्षेत्रीय टाफिक प्रहरी कार्यालय नेपालगञ्ज पठाएको छ । त्यस विषयमा रिपोर्ट आइनसकेको बताउँदै उहाँले चोरीका यातायात प्रयोगमा नल्याउन सबैलाई आग्रह गर्नु भएको छ ।
यसैबीच, जुम्लामा यस आर्थिक वर्षको ११ महिनामा सवारी दुर्घटनामा परी चार जनाको मृत्यु भएको छ । यो अवधिमा २८ वटा दुर्घटना भएकोमा ३ जना पुरुष र १ जना महिलाको मृत्यु भएको प्रहरी सहायक निरीक्षक अमर थापाले बताउनु भयो ।
