भाग खोसेको छैन ..... (गीत)

भाग खोसेको हाइन बाटो रोकेको छैन
मान्छे सग्लै छ लैजाउ नाता जोडेको छैन ।

हाँस्दै बोल्दै खेलेर ठट्टा रमाइलो गरेको
छैन कहिल्यै यो मनले गलत नजरले हेरेको ।
मलाई मन पराउँछिन् संकेत पाएको छैन
सँगै जिउने सँगै मर्ने कसम खुवाएको छैन ।

साथीको जस्तै व्यबहार गरिन्थ्यो सँगै हुँदा’नी
छुने त आँट आएन काखैमा बसेर रुँदा’नी ।
आफ्नै बनाउन मैले जोड बल गरेको छैन
खाली छ उनको सिउँदो सिन्दुर भरेको छैन ।

विनोद शर्मा ‘सानुभाइ’ २०६९/०८/०६

आंशु र मेरो सम्बन्ध ........(गीत)

आंशुसँगै बग्ने छैनन् मेरा मनका सपनाहरु
मेहनतले आकार दिन्छु साकार हुन्छन् आफैं बरु ।

खसाल्थे ढिक्का आँखाले सानै पिडा किन नहोस्
हुन्थ्यो टिलपिल परेली अरुले नैं दुःख पाओस् ।
दुःखको साथी ठानेर सकुन्जेल रुन्थें म त
मनको तनाव सारा पखालिन्छन् भन्थें पो त ।


आँखा सुख्खा भएपछि यसको मुल्य थाहा भो
छँदैछ बगोस् न ठान्थें रोग थपिंदा डाहा भो ।
अगाडि बढ्न दिंदैन पाइला छेक्छ आंशुले
गुम्न दिन्न म सवथोक बाटो नैं थुन्छु आफैंले ।

विनोद शर्मा ‘सानुभाइ’ २०६९/०८/२७

गीत ........ (माटोको सुगन्ध प्यारो)

माटोको सुगन्ध प्यारो, प्यारो छ फूलको सुवास
न्यानो छ घामको किरण, शितल छ जुनको प्रकाश ।

सातै रङ्गले जिन्दगीलाई रङ्गाउन पाए हुन्थ्यो
जुन तारा सवका प्यारा समिपमा आए हुन्थ्यो ।
ढिडोको गाँस मिठो, प्यारो छ पवनको साथ
म हुँ धर्तीको धुलो, भए पुग्छ खुल्ला आकाश ।

पसिना बगाउँछु बरु त्योसँगै बगाउन दुःख
छ जुनी विताउँछु म एक जुनी मिलोस् सुख ।
थोपा थोपा बटुलेर जोड्नुछ आफ्नै संसार
कांधमा कांध जोडेर सपना पार्नुछ साकार ।

विनोद शर्मा 'सानुभाइ'
२०६९/०८/१९

गजल ........... (साथि)

सुख दुःखमा साथ दिने सँगै हास्ने रुने साथी
ज्यान जति टाढा भए’नी मनले नजिक हुने साथी ।

सवै कुरा मुखले बोली भन्न सकिंदैन हजुर
जति राखोस् लुकाएर मनले मनलाइ सुने साथी ।

छोटो यात्रा एक्लै गरे’नी लामो यात्रा हुन्छ कठिन
लौरी बनि सारथी झैं पल पल सँगै हुने साथी ।

शंकालु हो मान्छेको जात ढुक्क विश्वास गर्दैन रे
छलफल गरी एक अर्कामा शंका सवै धुने साथी ।

नजिक हुँदा एक आपसमा माया प्रिती बढ्दै जान्छ
साँचो माया निस्वार्थले हृदयलाई छुने साथी ।


‘सानुभाइ’  २०६९/०८/२२