पोखरामा फेवा नव वर्ष महोत्सवको रौनक, आज पर्यटक दौड तथा आतसवाजी

पोखरा चैत्र ३०, विनोद शर्मा
पश्चिमाञ्चल होटल संघ पोखराको आयोजनामा पोखरामा जारी नवौं फेवा नववर्ष महोत्सव अन्तर्गत आज भएको पर्यटक दौडमा इजरायलका हरेल विजमेन प्रथम भएका छन् । लेकसाईडको छहारीदेखि शुरु भई महोत्सवस्थल बसुन्धरा पार्कमा पुगेर टुङिगएको दौडमा आयरल्याण्डका क्याथल बुर्गा द्वितीय भए भने जर्मनीका फ्लोरियल नेहरिङ तृतीय भएका छन् । यसैगरी महिला तर्फको मुल्यांकनमा बेल्जियमकी एलिना टाइमरम्यान्स प्रथम, न्युजिल्याण्डकी भिक्टोरिया ग्रिफन द्वितीय र बेलायतकी इमिली क्यारभेन तृतीय भए । 

प्रतियोगितामा कूल ६० विदेशी पर्यटकले भाग लिएको पर्यटक दौडका संयोजक माधव भण्डारीले जानकारी दिए । प्रतियोगितामा प्रथम हुनेलाई काठमाडौं पोखरा रुटको हवाई टिकटको व्यवस्था गरिएको छ । यसैगरी दोश्रो हुनेलाई अन्नपूर्ण प्याराग्लाईडिङबाट ४५ मिनेटनको उडान र तेश्रो हुनेलाई ग्रिनल्याण्ड टुर्सबाट काठमाडौं सम्मको वस टिकट पाउने छन् ।

महोत्सवमा अहिले बद्री पँगेनी, पशुपति शर्मा, दुर्गा रायमाझी तथा माण्डबी त्रिपाठीले साँस्कृतिक प्रस्तुती गरेका छन् । आजै नेपालकै सबैभन्दा होची महिला मञ्जु रेग्मीको नृत्य तथा हाँस्य कलाकार मनोज गजुरेलको हाँस्य प्रहशन गर्नुभएको क्षेत्रीय होटल संघ पोखराका अध्यक्ष विप्लव पौडेलले जानकारी दिनुभयो । अहिले लाईभ ब्याण्ड अन्तर्गत ११ः ३० बसन्त ब्याण्ड र दिव्या सुब्बाको प्रस्तुती गरिरहेका छन् । महोत्सवकै अवसरमा आज लेखनाथ नगरपालिकाका सम्पन्न भएको जोडी डान्सका विजेतालाई पुरस्कृत गरिएको छ । नयाँ वर्षको पुर्वसन्ध्यामा आज राती १० वजे र १२ वजे महोत्सवस्थलमा आतसवाजी गरिने छ भने भोली नयाँ वर्षको उपलक्ष्यमा राती आठ वजे आतसवाजी गरिन्छ । 

आजै राती नेपाल टेलिभिजनले दश वजेदेखि १ वजेसम्म महोत्सवबाट प्रत्येक्ष प्रसारण गर्ने भएको छ । उक्त कार्यक्रमका लागि सुगम पोखरेल, प्रमोद खरेल लगायतका गायक, गायिकाले आ आफ्नो प्रस्तुती गर्नेछन् । महोत्सवको दोश्रो दिनसम्ममा १० हजार भन्दा बढि टिकट बिक्रि भएको र २० हजार जनाले महोत्सव अवलोकन गरेका सँयोजक भरतराज पराजुलीले जानकारी दिनुभयो ।

फेवाताल बचाऔं भन्ने नारासँगै पोखरामा आन्तरिक पर्यटन प्रवद्र्धन गर्दै पोखराका प्राकृतिक र साँस्कृतिक सम्पदाको संरक्षणमा टेवा पुर्याउने उद्धेश्यले महोत्सव आयोजना गरिएको पश्चिमाञ्चल होटल संघ पोखराले जनाएको छ । नवौंपटक आयोजना गरिएको महोत्सवमा पर्यटन, संस्कृति र खानालाई बिशेष महत्व दिईएको छ । बैशाख २ गतेसम्म चल्ने महोत्सवमा खानाका १५ वटा तथा पर्यटन, व्यबसायिक र सामाजिक २५ गरि ४० वटा स्टल राखिएको छ । 

महोत्सव अवधिभर लेकसाईडका होटलहरुमा स्वदेशी पर्यटकका लागि बस्नमा ३० प्रतिशत र खानामा १० प्रतिशतसम्म छुट दिईएको पश्चिमाञ्चल होटल संघका अध्यक्ष विप्लव पौडेलले बताउनुभयो । महोत्सव अवलोकनकर्ताहरुलाई प्रतिव्यक्ति ५ हजार ५ सय रुपैंयाँ शुल्कमा हेलिकोप्टर मार्फत पोखरा आसपासका पर्यटकिय क्षेत्रहरुको अवलोकन गर्ने सुविधा पनि आयोजकले मिलाएको छ ।