पोखरेली रंगकर्मीहरु संगठित हुँदै, नाटककार उदासीको अध्यक्षतामा तदर्थ समिती

पोखरा बैशाख ९, विनोद शर्मा 

रंगमञ्चको उत्थान, हाम्रो अभियान भन्ने उद्षोष सँगै पोखरेली रंगकर्मीहरु संगठित भएका छन् । पोखरा उपमहानगरपालिका १ टुँडिखेलमा रहेको राष्ट्रिय उच्च माध्यामिक विद्यालयमा आज भएको भेलाले नाटककार कृष्ण उदासीको अध्यक्षतामा २५ सदसिय पोखरा नाट्य प्रतिष्ठान तदर्थ समिती समेत गठन गरेको छ । समितीको प्रथम उपाध्यक्ष हेमन्त पराजुली, द्धित्तिय उपाध्यक्ष  घनश्याम लामिछाने, महासचिव  विष्णु गौतम, सचिव अभिमन्यु बिक्रम राणा र कोषाध्यक्षमा प्रमिला तुलाचनलाई चयन गरेको छ ।

 २०६२/०६३ सालदेखि सुस्ताउँदै गएको पोखरेली रङ्गमञ्चलाई फेरी निरन्तरता दिने उद्धेश्यले पोखरामा भेला आयोजना गरिएको हो । कार्यक्रममा अवधारणापत्र प्रस्तुत गर्दै नाटककार कृष्ण उदासीले पोखरामा नाट्यशालाको अभाव र प्राविधिक सामाग्रीको व्यबस्था गर्न नसकिएकोले रङ्गमञ्च पछाडी परेको बताउनुभयो । उहाँले २०५५ सालमा पोखरामा क्षेत्रीय स्तरको नाटक महोत्सव भएको स्मरण गर्दै उहाँले फेरी पनि यस्ता कार्यलाई निरन्तरता दिनुपर्नेमा जोड दिनुभयो । 

कार्यक्रममा बोल्दै चलचित्रकर्मी माओत्से गुरुङले रङ्गमञ्च व्यबसायिकता नभएसम्म रङ्गकर्मी यहि क्षेत्रमा लागेर बाँच्न नसक्ने बताउँदै सरकारी तवरबाटै सहयोग हुनुपर्ने बताउनुभयो । भेलामा बोल्ने रङ्गकर्मीहरुले पोखरेली रङ्गकर्मीले नेपालकै रङ्गमञ्चमा पुर्याएको योगदानलाई निरन्तरता दिनका लागि भएको जमघटको स्वागत गरेका छन् । उनीहरुले पोखरामा नाट्यशाला निर्माण गरि रङ्गकर्मीहरु पलायन हुनबाट बचाउन सरकारले सघाउनुपर्नेमा जोड दिएका छन् । 

बालुन, घाँटु, सोरठी, भैरव नृत्य, गाईजात्रा परम्परागत लोकनाटकहरुमा गण्डक क्षेत्र चर्चित र धनी मानिन्छ । तर अहिलेको आधुनिक प्रविधिसँग प्रतिस्पर्धा गर्ने उपकरणहरु नहँुदा, तथा खर्चिलो र संवेदनशिल भएकोले पनि नाटक साहित्य अन्य विधा जस्तो नभएको नाटककार कृष्ण उदासीको भनाई छ । नेपालको रंगमञ्चमा चर्चित गुरुकुलको विघटन पछि पोखरामा शुरु भएको प्रयासलाई वाङ्मयप्र्रेमीहरुले उत्सुकताका साथ हेरेका छन् । सात महिना लगाएर खोज्दा पोखरामा ६ सय भन्दा बढि रङ्गकर्मीहरु भेटिएको भेला संयोजक हेमन्त पराजुलीले जानकारी दिनुभयो ।