प्राकृतिक चिकित्सालय विश्वविद्यालय बन्दै

पोखरा चैत्र २९, विनोद शर्मा
नवलपरासीको रजहरमा रहेको सामुदायिक प्राकृतिक चिकित्सालयले प्राकृतिक चिकित्सा र योग विषयको अध्यापन शुरु गर्दैछ । चिकित्सालयलाई नेपालकै पहिलो प्राकृतिक चिकित्सा विश्वविद्यालयका रुपमा विकास गर्ने लक्ष्य अनुसार यस वर्षदेखि शिक्षण अस्पताल भवन निर्माण गर्न लागिएको हो । शिक्षण अस्पताल भवनको यहि बैशाख २ गते प्रधानमन्त्री डा. बाबुराम भट्टराईले शिलान्यास गर्नुहुने चिकित्सालयका कार्यकारी निर्देशक हरि सापकोटाले जानकारी दिनुभयो । 

आगामी आर्थिक वर्ष २०७५/०७६ सम्ममा विश्वविद्यालयका रुपमा अध्यापन तथा स्वास्थ्य उपचारसेवा प्रदान गरिने कार्यकारी निर्देशक सापकोटाले बताउनुभयो । भवन निर्माण सम्पन्न भएपछि प्रमाणपत्र तहदेखि स्नातक तहसम्म प्राकृतिक चिकित्सा र योग विषयको अध्यापन शुरु गरिने चिकित्सालयका सहायक सुपरिटेण्डेन्ट डा. चन्द्रकान्त सुवेदीले जानकारी दिनुभयो । प्राकृतिक चिकित्सा पद्धतिमा प्रकृतिमा उपलब्ध आकाश,  वायु, अग्नी, जल एवं पृथ्वीद्धारा उपचार गरिने भएकोले रासायनिक तत्वबाट हुने नकारात्मक पुर्ण रुपमा बच्न सकिन्छ । 

चिकित्सालयमा अहिले ६० शैया छ भने ३ सय शैया पुर्याउने लक्ष्य राखिएको सहायक सुपरिटेण्डेन्ट डा. सुवेदीले बताउनुभयो । दश विगाहा क्षेत्रफलमा फैलिएको चिकित्सालयको जग्गालाई एमाले अध्यक्ष झलनाथ खनाल नेतृत्वको सरकारले भोगाधिकार प्रदान गरेको छ । नेपाल सरकारले आयुर्वेद, होमीयोपेथीक, युनानी, एलोपेथीक र प्राकृतिक चिकित्सालाई मान्यता दिएपनि एलोपेथीक पद्धतीलाई मात्रै प्राथमिकतामा राखेको छ । चिकित्सालयका कार्यकारी निर्देशक हरि सापकोटाले सरकारले एलोपेथीक चिकित्सा पद्धतीमा खर्च गर्ने एक चौथाई वजेट प्राकृतिक चिकित्साका क्षेत्रमा खर्च गरे सम्पुर्ण नेपालीलाई न्युनतम शुल्कमा उपचार गर्न सकिने दावी गर्नुभएको छ । 

२०६७ सालको बैशाख १ गतेदेखि रजहरबाट उपचार सेवा शुरु गरेको चिकित्सालयमा क्षमताभन्दा बढि बिरामी आउने गरेका छन् ।