पोखरामा पश्चिमाञ्चल स्तरिय सहकारी शिखर सम्मेलन हुने ।।

चैत्र ४ पोखरा ।।

अन्तराष्ट्रिय सहकारी वर्ष सन् २०१२ को अवसरमा पोखरामा पश्चिमाञ्चल स्तरिय सहकारी शिखर सम्मेलन हुने भएको छ । सहकारी वर्ष भरि गरिने कार्यक्रमको घोषणा गर्दै सहकारी प्रशिक्षण तथा डिभिजन कार्यालय कास्कीका प्रमुख चन्द्र बहादुर ठकुरीले, आगामी कार्तिक सम्ममा पोखरामा सहकारी शिखर सम्मेलन गरिने जानकारी दिनुभयो । सहकारी वर्षभरिमा गाउँ गाउँमा सहकारी जागरणका कार्यक्रम, सहकारी मेला, सहकारी सम्बन्धी नाटक प्रदर्शन तथा सहकारी सूचना केन्द्र सञ्चालन गरिने उहाले जानकारी दिनुभयो । 

 

कास्कीमा स्थानिय विकास अधिकारी गुरुप्रसाद सुवेदीको संयोजकत्वमा गठन भएको अन्तराष्ट्रिय सहकारी वर्ष २०१२ जिल्ला कार्यान्वयन समितीले, पोखरामा सहकारी स्तम्भ समेत निर्माण गर्ने भएको छ । कार्यक्रममा, राष्ट्रिय सहकारी सँघका अध्यक्ष केशव बडालले, प्रत्येक गाँउ विकास समितिमा एउटा सहकारी स्थापनाका लागि संघले अभियान संचालन गरिरहेको जानकारी दिनुभयो । उहाँले यो आर्थिक वर्षभित्रमा सबै जिल्लाका अधिकाँस गाविसमा सहकारी स्थापना भैसक्ने बताउनुभयो । यसका लागि क्याम्पस तथा विद्यालयहरुले आफ्ना विद्यार्थीलाई कम्तिमा २ दिन सहकारीका बारेमा प्रशिक्षण दिनुपर्नेमा बडालले जोड दिनुभएको छ । कार्यक्रममै वर्ष सञ्चालन कोषका लागि १ लाख २ हजार रुपैंयाको विउ पूजी सँकलन भएको छ । यसका लागि डिभिजन सहकारी कार्यालयले ५० हजार, जिल्ला सहकारी सँघले २५ हजार, कास्की वचत तथा ऋण सहकारी सँघले १२ हजार, सप्तगण्डकी दुग्ध उत्पादक सहकारी सँघले १० हजार र सनसाईन बचत सँस्थाले ५ हजार रुपैंया जम्मा गरेका हुन् । 

 

 कास्कीमा ४ सय ३० सहकारी सञ्चालनमा रहेका छन् । ग्रामिण क्षेत्रमा १ सय ९०, पोखरा उपमहानगरपालिकामा १ सय ९८ र लेखनाथ नगरपालिकामा रहेका ४२ वटा सहकारीमा ७५ हजार सदस्य आवद्ध रहेको सहकारी प्रशिक्षण तथा डिभिजन कार्यालय कास्कीले जनाएको छ ।

सन् २००९ को डिसेम्बरमा सँयुक्त राष्ट्रसंघको महासभाले सन् २०१२ लाई अन्तराष्ट्रिय सहकारी वर्षको रपमा मनाउने घोषणा गरेपछि, नेपालमा पनि मनाउन लागिएको हो । सहकारी व्यबसायद्धारा समृद्ध विश्व निर्माण भन्ने अन्तराष्ट्रिय नारा छ भने नेपालमा सहकारी व्यबसायद्धारा समृद्ध नेपाल निर्माण भन्ने नारा तय गरिएको छ । कास्कीमा सहकारी वर्ष सफल पार्नका लागि ३५ सदस्यीय मुल समिती तथा १२ वटा विभिन्न उपसमिती गठन भएको छ ।