कास्कीको ल्वाङघलेल ४ कोलेलीमा व्यबसायिक आलमण्ड खेतीको तयारी तिब्र

पोखरा २० जेष्ठ, विनोद शर्मा 

कास्कीको ल्वाङघलेल गाउँ विकास समिती वडा नम्बर ४ कोलेलीका किसानहरुले व्यबसायिक रुपमा चिनियाँ बदाम अर्थात आलमण्ड खेतीको तयारीलाई तिब्र पारेका छन् । ‘अलमण्ड स्टडी ग्रुप’को संयोजनमा भएको सम्भाव्यता अध्ययनपछि जनशक्ति कृषि तथा सिंचाई सहकारी संस्थाको संयोजनमा तयारीलाई तिब्र पारेका हुन् । ‘अलमण्ड स्टडी ग्रुप’को संयोजनमा ल्वाङघलेल सिहत सादिर्खोला, अर्मला तथा लुम्लेमा सम्भाव्यता अध्ययन गरिएको थियो । अध्ययनबाट ल्वाङघलेलको वडा नम्बर ४ कोलेलीमा आलमण्ड उत्पादनको सम्भाव्यता देखिएपछि किसानहरु उत्साहि भएका छन् । 

आलमण्डको व्यबसायिक उत्पादनका लागि कम्तिमा १ हजार रोपनी जग्गा आवश्यक पर्ने भएपछि सहकारीले आफ्ना सदस्य सहित अन्य जग्गावाला व्यक्तिहरुसँग ३ पटकसम्म छलफल गरिसकेको छ । किसानहरु समेत सकारात्मक भएपछि अहिले जग्गाको लगत लिने र मुल्याङकन गर्ने काम भैरहेको सहकारीका अध्यक्ष तथा जग्गा मुल्याङकन समितीको पनि संयोजक बाबुराम गौतमले जानकारी दिनुभयो । किसानहरुको करिव १२ सय रोपनी जग्गाको मुल्याङकन गरि माटो परिक्षणको काम शुरु गरिने सहकारीका सचिव कृष्ण दवाडीले बताउनुभयो । १४ सय मिटरभन्दा माथीको उचाईमा आलमण्ड खेती हुने विज्ञहरुले बताएका छन् । सहकारीले माथील्लो भेगमा आलमण्ड खेती गर्ने र तत्लो भेगमा व्यबसायिक रुपमा पशु पालन गर्ने योजना बनाईरहेको छ । 

चिनियाँ बदाममा भिटामिन ई, प्रोटिन, क्याल्सियम, आइरन, फस्फोरस लगायतका तत्वहरु पाइने विज्ञहरु बताउँछन् । सौन्दर्य तेल, क्यान्सर विरुद्धको औषधि तथा आँखाको सुरक्षाका लागि यसको प्रयोग हुने ‘अलमण्ड स्टडी ग्रुप’का संयोजक कुसुम केशव पराजुलीले बताउनुभएको छ । १ हजार रोपनीमा चिनिया बदाम खेती गर्न ८ करोड रुपैयाँ खर्च लाग्ने र ५ वर्षसम्ममा लगानी उठाउन सकिने संयोजक पराजुलीले बताउनुभयो । 

बदामको एउटा बिरुवा हुर्काउनमात्रै ५ हजार रुपैयाँभन्दा बढी खर्च लाग्ने ग्रुपले जनाएको छ  । सहकारीद्धारा यसको खेती गर्नु उत्तम हुने विज्ञहरुले बताएका छन् । हाल नेपालमा वार्षिक ४० करोड रुपैयाँ बराबरको चिनियाँ बदाम भित्रिने गरेको तथ्याङक छ । भारतमा वार्षिक ५८ हजार मेट्रिक टनभन्दा बढी बदाम खपत हुने गरेकाले यसको व्यावसायिक उत्पादन गरेमा नेपालले आफ्नो सम्पूर्ण उत्पादन भारतलाई निर्यात गर्न सक्ने प्रारम्भिक अनुसन्धानले देखाएको छ ।