अन्तर्राष्ट्रिय एकल महिला दिवसको अवसरमा पश्चिमाञ्चलमा पञ्चवर्षिय योजना बन्दै

पोखरा असार ९, विनोद शर्मा 

अन्तर्राष्ट्रिय एकल महिला दिवस, आज नेपालमा पनि विभिन्न कार्यक्रम गरि मनाईएको छ । श्रीमान गुमाएका महिला र उनीहरुका बालबालिकाले भोग्नुपर्ने समस्यालाई विशेष पहिचान दिन र उनीहरुको मानव अधिकार रक्षा र सशक्तिकरण गर्ने उद्धेश्यले राष्ट्रसंघको आव्हानमा हरेक वर्ष जुन २३ तारिखमा यो दिवस मनाईन्छ । लाखौं एकल महिला र उनीहरुमा आश्रीतले भोगिरहेको गरीबी र अन्यायलाई सम्बोधन गर्न राष्ट्रसंघले २०१० को डिसेम्बरमा २३ जुनमा दिवस मनाउने निर्णय गरेको थियो । 

दिवसका अवसरमा सन्देश दिंदै राष्ट्रसंघका महासचिव बान की मूनले विश्वभरका एकल महिलाका विरुद्ध हुने भेदभाव समाप्त पार्न र उनीहरुलाई मानव अधिकारको उपभोग गर्नका लागि सक्षम बनाउनुपर्नेमा जोड दिनुभएको छ । श्रीमान गुमाएका, श्रीमान हराएका, सम्बन्ध विच्छेद गरेका र बिहे नगरी बसेका महिलालाई एकल महिलाका रुपमा परिभाषित गरिएको छ । 

पोखरामा भने एकल महिलाको सवालमा पञ्चवर्षिय योजना बनाउने उद्धेश्यले क्षेत्रीय स्तरको कार्ययोजना गोष्ठि शुरु भएको छ । रानीपौवामा भैरहेको गोष्ठिको एकल महिला समूहका पश्चिमाञ्चल क्षेत्रीय अध्यक्ष दुर्गा न्यौपानेले उद्घाटन गर्नुभएको छ । उद्घाटन सभालाई सम्बोधन गर्दै अध्यक्ष न्यौपानेले स्थानिय देखि राज्यस्तरसम्म एकल महिलाको पहुँच पुर्याउन र एकल महिलालाई सक्षम बनाउन पञ्चवर्षिय योजना आवश्यक रहेको बताउनुभयो ।

एकल महिला समूह कास्कीका अध्यक्ष प्रमिला तझ्याले एकल महिलालाई संगठित गर्न र आफ्ना समस्याहरु खुलेर बताउन पनि दिवशले महत्वपुर्ण भूमिका खेल्ने बताउनुभएको छ । आजको छलफलबाट पाँच वर्षमा के के गर्ने विषयमा सामान्य खाका तयार पारिएको जिल्ला कार्यसमिती सचिव जुना के.सी.ले जानकारी दिनुभयो । उक्त खाकामा राखिएका विषयबस्तुमाथी भोली छलफल गरेर अन्तिम रुप दिईने उहाँले बताउनुभयो । भोलीसम्म सञ्चालन हुने गोष्ठीमा पश्चिमाञ्चलका १० जिल्लाका १८ जना एकल महिलाहरुको सहभागिता रहेको छ ।