एकल महिलाद्धारा पश्चिमाञ्चलका १० वटा जिल्लामा सहकारी सञ्चालन गर्ने

पोखरा असार १०, विनोद शर्मा 

एकल महिलाको आयआर्जन र सशक्तिकरणका लागि पश्चिमाञ्चलका १० वटा जिल्लामा सहकारी स्थापना हुने भएको छ । एकल महिला समूह पश्चिमाञ्चलले आगामी पाँच वर्षमा सहकारी स्थापना गरिसक्ने जनाएको हो । स्थानिय देखि राज्यस्तरसम्म एकल महिलाको पहुँच पुर्याउन र एकल महिलालाई सक्षम बनाउन उदेश्यले निर्माण गरिएको पञ्चवर्षिय योजनामा सहकारी सञ्चालन गरि एकल महिलालाई सक्षम बनाउने उल्लेख गरिएको छ । 

योजनामा ५ वटा जिल्लामा एकल महिलाको समूह कार्यालय अर्थात छहारी निर्माण गर्ने, हिमालपारीको जिल्ला मनाङ र मुस्ताङमा जिल्ला स्तरिय समूह र सबै गा.वि.स.मा गाउँ स्तरिय समूह गठन गरिसक्ने जनाईएको छ । पाँच वर्षको अवधिमा पश्चिमाञ्चलबाट नेतृत्व गर्न सक्ने गरि ५० जनालाई क्षमता अभिबृद्धि गर्ने एकल महिला समूह कास्कीको सचिव, जुना के.सी.ले जानकार िदिनुभयो । 

त्यस्तै सबै जिल्लामा अक्षयकोष अथवा अवसरकोष स्थापना गरि बालबालिकालाई छात्रबृत्ति प्रदान गर्ने कुरा पनि योजनामा राखिएको छ । पोखरामा हिजो देखि शुरु भएको क्षेत्रीय स्तरको कार्ययोजना गोष्ठिले एकल महिला र उनीहरुका बालबालिकाले भोग्नुपर्ने समस्याको समाधान, मानव अधिकार रक्षा र सशक्तिकरण गर्ने विषयमा पञ्चवर्षिय योजना बनाएको हो ।

गोष्ठिको समापन गर्दै पश्चिमाञ्चल क्षेत्रीय अध्यक्ष दुर्गा न्यौपानेले सहकारीबाट बचत तथा ऋण लगानी गरि सबै एकल महिलालाई सक्षम बनाउने बताउनुभएको छ । सहकारी स्थापना र सञ्चालनका लागि सरकारी सतरबाट समेत सहयोग हुनुपर्नेमा उहाँले जोड दिनुभएको छ । गोष्ठीमा पश्चिमाञ्चलका १० जिल्लाका एकल महिला समूहका १८ जना पदाधिकारीहरुको सहभागिता रहेको छ ।