छुटेकाहरुलाई छिटो नाम दर्ता गराउन निर्वाचन आयोगले अनुरोध

पोखरा असार ९, विनोद शर्मा 

फोटो सहितको मतदाता नामावलीमा नाम दर्ता गर्न छुटेकाहरुलाई छिटो नाम दर्ता गराउन निर्वाचन आयोगले अनुरोध गरेको छ । अहिले सबै जिल्ला निर्वाचन कार्यालय, जिल्ला प्रशासन कार्यालय र इलाका प्रशासन कार्यालयमा नाम दर्ताको काम भैरहेको छ । जिल्ला निर्वाचन कार्यालयले प्रशासन कार्यालय र ईलाका प्रशासन कार्यालयमा नागरिकता बनाउन आउनेहरुको नामावली तत्काल दर्ताका लागि छुट्टै कर्मचारी खटाएको छ । 

व्यापार, व्यवसाय, अध्ययन वा अरु कामको सिलसिलामा आफ्नो स्थायी ठेगाना भन्दा बाहिर बसोबास गरेकाहरुले अहिले आफू रहेको जिल्लाबाटै नाम दर्ता गर्न सक्ने व्यवस्था पनि गरिएको छ । सरकारले आगामी मँसिर ७ गते सँविधानसभा चुनावको घोषणा गरेपछि आयोगले यस्तो अनुरोध गरेको हो । चुनाव हुनुभन्दा ७५ दिनअघिसम्म मात्र नामावली संकलन गर्न सकिने जिल्ला निर्वाचन कार्यालय कास्कीका प्रमुख घनश्याम भण्डारीले बताउनुभयो । निर्वाचन आयोगका अनुसार १६ वर्ष उमेर पुगेका र नागरिकताको प्रमाणपत्र प्राप्त गरेका झण्डै नौ लाख जनाको नामावली संकलन गर्न बाँकी छ । 

फोटो सहितको मतदाता नामावलीको लागि विवरण दर्ता गरिसकेका व्यक्तिहरुले आफ्नो नाम भए नभएको बारे आयोगको वेवसाइट www.election.gov.np  र जिल्ला निर्वाचन कार्यालयमा हेर्न सकिने पनि आयोगले जनाएको छ । नाम त्रुटी भएमा सच्याउनको लागि जानकारी गराउन पनि आयोगले अनुरोध गरेको छ । अहिलेसम्म एक करोड ६ लाखले फोटो सहितको मतदाता नामावली दर्ता गराइसकेका छन् भने ३० लाख मतदाता विदेशमा रहेको अनुमान छ ।