धेरै पर्यटक भित्रयाउने व्यबसायिलाई सरकारको अनुदान ।

पोखरा असार १७, विनोद शर्मा 

एकपटकमा सय जनाभन्दा बढी विदेशी पर्यटक हवाई मार्गबाट भित्रयाउने पर्यटन व्यवसायीलाई सरकारले पाँच लाख रुपैंयासम्म अनुदान दिने भएको छ । संस्कृति, पर्यटन तथा नागरिक उड्डयन मन्त्रालयले बनाएको कार्यविधिमा एक सय भन्दा बढि पर्यटक भित्रयाउने व्यबसायिलाई प्रोत्साहन गर्न अनुदान दिने उल्लेख गरिएको छ । पर्यटन क्षेत्रको विकासबाट विदेशी मुद्रा आर्जन तथा रोजगारीको अवसर वृद्धि गरी राष्ट्रिय अर्थतन्त्र सुदृढ बनाउन मन्त्रालयले कार्यविधिलाई कार्यान्वयनमा ल्याउन लागेको हो । 

सयजनाभन्दा बढी हवाई मार्गबाट नेपाल आउने विदेशी राहदानी बाहकलाई सहभागी गराई सभा, सम्मेलन, गोष्ठी, बैठक वा अन्तक्र्रिया आयोजना गरेमा त्यस्ता आयोजकलाई पाँच लाख रुपैंयासम्म नगद अनुदान दिईने मन्त्रालयका सचिव डा गणेशराज जोशीले बताउनुभयो । अनुदान रकम पाउन कार्यक्रम सम्पन्न भएको सात दिनभित्र निवेदन दिनुपर्ने छ । व्यबसायिले निवेदन दिएको सात दिनभित्रै अनुदान उपलब्ध गराइने, कार्यविधिमा व्यवस्था गरिएको सचिव जोशीले जानकारी दिनुभयो ।

सरकारले नैं पर्यटन व्यबसाय मार्फत रोजगारीको अवसर वृद्धि गरी राष्ट्रिय अर्थतन्त्र सुदृढ बनाउने पहल स्वरुप व्यबसायिलाई प्रोत्साहित गर्न लागेकोमा पोखराका व्यबसायिहरुले स्वागत गरेका छन् । एकै पटकमा सय जनाभन्दा बढि पर्यटक आउँदा करोडौंको कारोबार हुने पर्यटन व्यबसायिको भनाई छ । नेपालमा अरु मुलुकबाट भन्दा चिनबाट एकैपटकमा सयजना भन्दा पर्यटक ल्याउन सजिलो हुने पश्चिमाञ्चल होटल संघ पोखराका उपाध्यक्ष भरतराज पराजुलीको भनाई छ ।

ढिला भए पनि सरकारले पर्यटन व्यबसायलाई अर्थतन्त्रको मेरुदण्डका रुपमा हेरेको भन्दै उपाध्यक्ष पराजुलीले खुशी व्यक्त गर्नुभयो । एकजना पर्यटक नेपाल भित्रदा उसका लागि प्रत्येक्ष र अप्रत्यक्ष गरि १३ जनाले रोजगारी पाउने पोखरा पर्यटन परिषदका अध्यक्ष टिकाराम सापकोटाले जानकारी दिनुभयो । सरकारले पर्यटन वर्ष २०११ कै अवसरमा ठुलो सँख्यामा पर्यटक भित्रयाउने व्यबसायिलाई अनुदान दिने बताएको हो । 

यसैवीच, पर्यटकिय नगरि पोखराको प्रवद्र्धनका लागि पर्यटन व्यबसायिहरु भारतको सिमा क्षेत्रमा जाने भएका छन् । पोखरा सुरक्षित र अनुकुल मौसमको शहर हो भन्ने बारेमा भारतको गोरखपुर, कानपुर र लखनउमा प्रचार प्रसार गर्ने पश्चिमाञ्चल होटल संघ पोखराका उपाध्यक्ष भरतराज पराजुलीले बताउनुभयो । पश्चिमाञ्चल होटल संघ पोखराको नेतृत्वमा पोखराका पर्यटन व्यबसायिहरुको टोली यहि असार २१ गते गोरखपुर जान लागेको हो ।

पर्यटन बोर्डसँगको सहकार्यमा हुने कार्यक्रममा ट्राभल एजेन्ट, सञ्चारकर्मीहरुसँग, होटल व्यबसायिकहरुसँग पोखराको प्रवद्र्धनका बारेमा बृहत छलफल गरिने पश्चिमाञ्चल होटल संघका अध्यक्ष विप्लव पौडेलले बताउनुभयो । पोखरामा पर्यटक भित्रयाउनका लागि पोखराका पर्यटन व्यबसायिहरुले विभिन्न ठाउँमा प्रवद्र्धननात्मक कार्यक्रमहरु गरिरहेका छन् ।