रोटरी क्लवद्धारा अभियानका रुपमा रक्तदान कार्यक्रमको शुरुवात

पोखरा असार ९, विनोद शर्मा 

पोखराको बिन्ध्याबासिनी र लेखनाथको अर्घौंचोकमा भएको बृहत रोटरी रक्तदान कार्यक्रममा १ सय ४५ जनाले रक्तदान गरेका छन् । पोखरामा रहेका ६ वटा रोटरी क्लवहरु, ६ वटा रोटर्याक्ट क्लव तथा २ वटा आर सिसिहरुको संयुक्त आयोजनामा रक्तदान कार्यक्रम भएको हो । पोखराको बिन्ध्याबासिनी मन्दिर परिसरमा भएको कार्यक्रममा १ सय ३ जनाले रक्तदान गरेका छन् भने लेखनाथको अर्घौचोकमा ४२ जनाले रक्तदान गरेका छन् । 

नेपाल रेडक्रस सोसाईटीको प्राविधिक सहयोगमा भएको कार्यक्रममा ओ नेगेटिभ रगत समूह भएका ४ जना, एबी नेगेटिभ समूहका १ जनाले रक्तदान गरेका थिए । ब्लड बैंकमा ओ नेगेटिभ समूहको रगत लामो समयसम्म राख्न नमिल्ने भएकोले पाँच जनालाई अन कल अर्थात परेको बेला बोलाउने गरि राखिएको नेपाल रेडक्रस सोसाईटीले जनाएको छ । जिल्लामा रगतको अभाव हुन नदिन तथा रक्तदानको महत्वका बारेमा सर्वसाधारणलाई बुझाउने उद्धेश्यले कार्यक्रम गरिएको संयोजक रोटरियन शिवलाल मल्लले जानकारी दिनुभयो । 

रक्तदानको उद्घाटन गर्दै २०१४/०१५ का लागि प्रस्तावित डिस्ट्रिक्ट गभर्नर ३२९२, रविन्द्र कुमार पियाले रगतको सम्बन्धले सबैलाई एकैठाउँमा जोड्ने विश्वास व्यक्त गर्नुभएको छ । रोटरी क्लव डिस्ट्रिक्ट ३२९२ ले अभियानका रुपमा देशैभरी सञ्चालन गर्न लागेको बृहत रक्तदान कार्यक्रम पोखराबाट शुरु भएको संयोजक मल्लले जानकारी दिनुभयो । मानिसको शरिरमा रहेको रगत ३, ३ महिनामा परिवर्तन भैरहने भएकोले त्यस्तो परिवर्तन हुने रगतलाई दान गरेर अर्को व्यक्तिलाई रगतको अभावबाट ज्यान गुमाउन नदिनका लागि रक्तदान गर्न रेडक्रसले सबैसँग आग्रह गरेको छ । सामान्य व्यक्तिले ३, ३ महिनामा रगतदान गर्न सक्छन् ।