नमुना विद्यालय हेर्न एक हजार रुपैयाँ प्रवेश शुल्क

पोखरा, 

शैक्षिक गतिविधि हेर्न दिनहुँ भ्रमण र अवलोकन टोली आउन थालेपछि पढाइमा बाधा पुगेको भन्दै भरतपोखरीको एक विद्यालयले बिना शुल्क विद्यालय छिर्न नपाइने नियम बनाएको छ । त्यो पनि हप्ताको एक दिन शुक्रबार दिउँसो एक बजेपछि मात्रै ।

यस्तो नियमले आर्थिक स्रोत थपिने त भइहाल्यो, शुक्रबार दिउँसो भएपछि पढाइलाई पनि बाधा नपुग्ने भयो । भरतपोखरी ४ स्थित सरकारले नमुना घोषणा गरेको शिशुकल्याण निमाविले दिनहुँ आउने टोलीलाई 'ब्रिफिङ' गर्दागर्दै पठन पाठनमै समस्या भएको भन्दै यस्तो नियम राखेको हो । 'पढाइमा बाधा नपुगोस् भनेरै यस्तो व्यवस्था गरेका हौं', प्रधानाध्यापक मन्त्रीलाल पौडेलले भन्नुभयो, 'न्यूनतम एक हजार रुपैयाँ प्रवेश शुल्क राखेका छौ, इच्छा भएकाले बढी दिए पनि स्विकार्छौ ।'

व्यवस्थापकीय जिम्मा समुदायले लिएपछि नमुना बनेको विद्यालयमा दिनमै ५/६ अवलोकन टोली आउने गरेका छन् । एकै दिन २ सय ५० सम्म आएको रेकर्ड छ ।  प्रधानाध्यापक  र शिक्षक विद्यालयको गतिविधि देखाउनमा ठिक्क हुनुपर्ने बाध्यता हटाउन २०६७ को असोजबाट व्यवस्थापन समितिको निर्णय अनुसार शुल्क र शुक्रबार राखिएको पौडेलले बताउनुभयो । भ्रमण गर्ने कहिल्यै नटुट्ने र अनुगमन, भ्रमणको नाममा चाहिने/नचाहिने कुरा सोधेर हैरान पारेकाले शुल्क लिनुपरेको पौडेलेको भनाइ छ । सुर्खेतबाट आएको एक टोलीले एक हजार रुपैयाँ दिन नमानेपछि त्यत्तिकै फकाइदिएको विद्यालयले जनायो । शिक्षाका कर्मचारी र पत्रकारलाई भने यस्तो नियम लागू हुँदैन ।

बाल विकासदेखि ७ कक्षासम्म पढाइ हुने विद्यालयले दक्ष प्रधानाध्यापक, सफल शिक्षक, लगनशील र अनुशासित विद्यार्थी, प्रतिबद्ध विद्यालय व्यवस्थापन समिति र जागरुक अभिभावक नमुना विद्यालयका सूचक मानेर काम गर्दै आएको छ । भौतिक पूर्वाधार सम्पन्नतासँगै शैक्षिक गुणस्तर उकास्न फरक शिक्षण विधि अवलम्बन गरेपछि विद्यालय जिल्लामै नमुना छ । यसको अनुभव बटुल्न देशैभरिबाट भ्रमण तथा अवलोकन टोली आउन थालेका हुन् ।